最近呢個月，我哋半停工狀態，因為一直以嚟我哋講工藝係為咗教育，講環保係為咗氣候變化，做嘅事都係與我哋下一代有關，想以後佢哋有個更好嘅環境。但係而家，呢個香港，我哋已經冇哂心機再講落去，大家嘅心情都好差好差，而手上的項目亦冇辦法好好進行。
直至上堂時同學的提醒，木工其實就係最好的方法。唔係為咗分心而做木工，而係學習專心冷靜，因為係做木過程，只要稍不留神就手指都冇埋，所以要個心靜落嚟，係做木工嘅必要條件之一。
因為咁，我哋開始諗呢個時候除咗擁抱仲有咩可以幫到手而又用到我哋唯一在行嘅事 - 木藝，所以今次同大家講下蝴蝶榫。蝴蝶榫通常用在修補裂開的木頭上，因為兩邊的燕尾形可以將木板裂縫拉緊，防止木材再裂落去，對我哋嚟講蝴蝶榫就好似木工用的繃帶，修補好多地方，亦係一個心靈上的修復鍛練。
噚日我哋同班後生仔女學習用蝴蝶榫俾個心休息一個晚上，我哋冇限制大家做蝴蝶榫的外形，因為大家唔一定要行同一套路，各有各做，達到目的就好。成日話學習木藝之餘，我哋係學緊點做人，點做一個香港人
心情或者不能因為一次半次的workshop而收拾到，但要俾你哋知道，我哋永遠企係你哋度。